ظــــلام

دامس حيـــــــــــــــــل..

والسهر..

ساكن اهدابه

وارق..

في ارق..

في ارق..

ووحده في عتيم الليـــــل..

وبيوت طين

مرّت عليها سنين

وحصاةٍ تنحذف له

من شباك جيرانه

وصوت ناعم وينده له

ويشرح بعض وجدانه

عكّر له مزاجه

وزاد الضيق وازعاجه

وفجئه..

في عزّ ما النفس محتاجه

لمح شمعه.. بشباك احبابه

والشوق شب في قلبه وحرق

مشى الدرب الطويــــــــــــــل

وصل بيته

وقف ساعه على بابه

وطرق..

طرق..

طرق..

ما جاوبه صوت

يدور بلسم جراحه

جنون الشوق يجتاحه

ويحط به الهمّ ويشيل

وتجاهلته بيوت

وثنى وسطى وسبابه

وعوّد طرق..

وطرق..

وطرق..

وطفيت الشمعه

ودبّ في سمعه

ترا طولت في بابي!!

آسف ...

شمعتي ماهي عشانك

أنتظر غالي احبابي

يا ليت هو في مكانك

طارت احلامه مثل الورق

عنوان احبابه غلط

الحب.. ماهو بالكتابه

وحروف تنقصها النقط

وفي محله ذاب

ولسان انربط

واختلق اسباب

آسف..

الابواب تتشابه

وانتهت للحب قصه

وتنفس الحسره وشرق

وتسكرت ابواب

وتجرع الغصه

وفي نفسه عتاب

يا ليته موعدك

مثل ما خنتني خانك

وبلع ريقه وغرق

ويسمع من بعيــــــــــــــد

صوت من قلبه ويجاوبه الوريد

لا تندم على الماضي

وحبيبٍ خان ما صانك

عمرٍ راح ع الفاضي

ترا الوقت انسرق

روح دوّر لخلانك

رجع والشوق يغتاله

شرب سمّه بفنجاله

وصل بابه

ولقى ذيك الحصاة

ولقى قطعة ورق

وحروف في صيغة وصاة

وتملكه .. بعض الفضول

ويكاد حتى يهلكه

في موقفه ضاعت فصول

او درب يقدر يسلكه

وقرا ذيك القصاصه وما احتوته

وكان اسمه

اول ما عينه قرته

إنتظرتك

و انتظرتك

و انتظرتك

اخترت غيري وانا اخترتك

حبك فضحني مع هلي

عساك تتهنا معاه

ادعي لي وترحّم علي

اشهد ان لا اله الا الله

انصدم باللي قراه

وتزلزلت فيه الاراضي ومال

ما قوى يستحمل وطاح

صارت القصه خيال

هالحب يا مقوى بلاه

وشققت قلبه جروح

رفع سبابته وقال

اشهد ان لا اله الا الله

وفاضت الروح

ومروا عليه اثنين

قال الاول:

للاسف مدمن حشيش

رد له الثاني: 

يتعاطى خمر وهيروين

ما يستاهل يعيش

وفوقهم اتبسمت  روحين

بس للاسف..

!!!

!!! 

بعد ايش...!!!!